Составлен прот. Сергием Филимоновым. Передан на утверждение Издательским Советом Русской Православной Церкви.
Одобрен правлением Общества православных врачей Санкт-Петербурга им. свт. Луки (Войно-Ясенецкого)
для келейного чтения.
Тропарь, глас 3
Страстоте́рпче святый и пра́ведный врачу́ Евге́ние, моли́ ми́лостиваго Бо́га, да прегреше́ний оставле́ние пода́ст душа́м на́шим.
Кондак, глас 2
Звезда́ све́тлая яви́лся еси́, непреле́стная ми́рови, Со́лнца Христа́ возвеща́ющи, заря́ми Твои́ми страстоте́рпче Евге́ние, и пре́лесть угаси́л еси́ всю, нам же подае́ши свет, моля́ся непреста́нно о всех нас.
Величание
Велича́ем тя, страстоте́рпче святы́й Евге́ние, и чтим честна́я страда́ния твоя, яже за Христа́ претерпе́л еси́.
Кондак 1
Избра́нный Христо́м Бо́гом на путь враче́бнаго служе́ния во́ином, ни́щым и сестра́м милосе́рдия напра́вленный, у́зким путе́м с Ца́рственными Му́ченики на закла́ние до́бле после́довавый, ве́рный сло́ву и до́лгу, Небе́сному и земно́му Царе́м непоколеби́мо оста́вшийся; во е́же в ве́чный поко́й с новому́ченники и испове́дники росси́йскими вни́ти, венце́м свя́тости уве́нчанный, тебе́, врачу́ благода́тный, во умиле́нии серде́ц на́ших с благодаре́нием взыва́ем:
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Икос 1
Живо́т пра́ведно на земли́ ижди́вый, по́двигом служе́ния боля́щим и стра́ждущим просия́вый, ве́рность до́лгу враче́бному и сло́ву че́сти Христу́ соблюды́й и в невече́рнем дни Ца́рствия Бо́жия пред Живонача́льною Тро́ицею предстоя́щий, услы́ши нас, стратоте́рпче святы́й Евге́ние, в ми́ре лука́вом сем по́мощи у тебе́ прося́щих и с наде́ждою вопию́щих:
Ра́дуйся, из млады́х лет благоутро́бие ма́тере своея усво́ивый,
Ра́дуйся, се́рдце свое́ к служе́нию бли́жним предугото́вивый;
Ра́дуйся, зако́ну Бо́жию внима́вый,
Ра́дуйся, в уче́нии земно́м неле́ностно преуспева́вый;
Ра́дуйся, от непра́вды, зла и наси́лия уклони́выйся,
Ра́дуйся, красото́ю доброде́лания отца своего́ пленивыйся;
Ра́дуйся, род Бо́ткиных до Не́ба возвы́сивый,
Ра́дуйся, семе́йное дре́во сла́вою небе́сною украси́вый;
Ра́дуйся, в ве́ре и благоче́стии воспита́нный,
Ра́дуйся, призре́нием ни́щих оправда́нный;
Ра́дуйся, ве́рности Оте́честву науче́нный,
Ра́дуйся, благоро́дством ро́да све́тло окрыле́нный.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 2
Уразуме́в тще́тность сла́вы челове́ческия, соде́лался еси́ во́ли Бо́жией исполни́телем и путь служе́ния бли́жнему избра́л еси́, подо́бно отцу́ своему́ дap цели́ти неду́ги челове́ческия от Бо́гa пpия́л еси́ и тала́нты, Го́сподем да́нные, не закопа́л еси́, вся дарова́нная Бо́гом преумно́жил еси́ и на бла́го стра́ждущим отда́л еси́; нас, в суете́ мяте́жней мяту́щихся, науча́еши про́мыслу Бо́жию внима́ти и воспева́ти Бо́гу: Аллилу́иа.
Икос 2
Бога́тство, власть и по́честь ни во что́же вмени́в, по́честей вся́ких избега́л еси́, в лече́бницу Марии́нскую для ни́щым устро́енную прише́л еси́, иде́же кровь, гной и нищету́, я́ко драгоце́нности Христо́вы прия́л еси́, сего́ ра́ди со святы́ми бессре́бренницы, приими́ от нас похвалы́ таковы́я:
Ра́дуйся, милосе́рдию нас научи́вый,
Ра́дуйся, путе́й ле́гких в жи́зни не избира́вый;
Ра́дуйся, уро́ки враче́бныя ученико́м дава́вый,
Ра́дуйся, утеша́ти боля́щих и стра́ждущих науча́вый;
Ра́дуйся, сесте́р милосе́рдия окормля́вый,
Ра́дуйся, в служе́нии их укрепи́вый;
Ра́дуйся, семе́йство твое́ забо́той покрыва́вый,
Ра́дуйся, го́ре му́жественно претерпе́вый;
Ра́дуйся, супру́гою свое́ю с ма́лыми детьми оста́вленный,
Ра́дуйся, их воспита́нию всеце́ло преда́нный;
Ра́дуйся, любо́вь ча́дом твои́м дарова́вый,
Ра́дуйся, никогда́ их не преда́вый.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 3
В годи́ну ру́сско-япо́нския бра́ни на Да́льний Восто́к после́довал еси́, врачебный о́пыт к ра́неным применя́я, на по́ле бра́ни их те́лом свои́м закрыва́л еси́, и я́ко оте́ц чадолюби́вый пред кончи́ною утеша́л еси́; любо́вию Христо́вою согрева́я, в живо́т Ве́чный провожда́л еси́, науча́я пе́ти Бо́гу: Аллилу́иа.
Икос 3
Страда́ния во́инов Оте́чества земна́го виде́в, пра́вду и лжеслове́сие, хра́брость и бо́язнь, до́блесть и малоду́шие посреде́ тех наблюда́л еси́, «те́ни и свет войны́» ру́сско-япо́нския описа́л еси́, все упова́ние свое́ на Бо́га возложи́в, по́двиг ра́тный досто́йно проше́л еси́; сего́ ра́ди Оте́чество воинскими почестьми тя награди́, чу́дный Евге́ние, мы же, недосто́йнии, с ве́лиею ра́достию похва́льная воспева́ем ти:
Ра́дуйся, на войну́ добровольно отпра́вивыйся,
Ра́дуйся, за пле́щами во́инов не укрыва́выйся;
Ра́дуйся, на по́ли бра́ни с ра́неными пребыва́вый,
Ра́дуйся, от врага́ их защища́вый;
Ра́дуйся, ра́ны во́инов врачева́вый,
Ра́дуйся, их ду́ши в ско́рби сме́ртней утеша́вый;
Ра́дуйся, наде́ждою живота́ Ве́чнаго их возвесели́вый,
Ра́дуйся, в оби́тели Небе́сныя их провожда́вый;
Ра́дуйся, всех враче́й вое́нных сла́во,
Ра́дуйся, ве́ры христиа́нския щи́те и забра́ло;
Ра́дуйся, ле́карей иску́сных похвало́,
Ра́дуйся, враче́й правосла́вных жи́зни пра́вило.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 4
На по́ли бра́ни до́бле потруди́выйся, во град свята́го Петра́ к труда́м цельбоно́сным возврати́выйся, чета́ ца́рская по сме́рти врача́ их цели́вшаго, в тебе обре́те но́ваго придво́рнаго ле́каря, ты же житие́ свое́ в ру́це Бо́жии преда́вый, на путь служе́ния ца́рственному семе́йству прии́де, поя Врачу́ душ и теле́с: Аллилу́иа.
Икос 4
Здра́вие царя Никола́я, цари́цы Алекса́ндры, царе́вен Мари́и, Татиа́ны, О́льги, Анастаси́и испы́тно сохраня́я, цесаре́вича Алекси́я страда́ния кровоточи́вая облегча́л еси́, все́гда пре́данно ря́дом пребыва́я, в похо́дех и путешествиих ца́ря непреста́нно дориноси́л еси́, приими́ от нас, недосто́йных, похвалы́ таковы́я:
Ра́дуйся, персто́м Бо́жиим указа́нный,
Ра́дуйся, посреде́ мно́гих враче́й цари́цею заме́ченный;
Ра́дуйся, придво́рным ле́карем избра́нный,
Ра́дуйся, я́ко ве́рный друг и слуга́ осо́бам ца́рским дарова́нный;
Ра́дуйся, их здра́вие соблюда́вый,
Ра́дуйся, поко́й их душ оберега́вый;
Ра́дуйся, та́йну насле́дника престо́ла сохрани́вый,
Ра́дуйся, цесаре́вича неду́ги врачева́вый;
Ра́дуйся, кровотворе́ние изуча́вый,
Ра́дуйся, мно́гим кровоточа́щим больны́м помога́вый;
Ра́дуйся, от одра́ стра́ждущих неду́гами теле́сными не отходи́вый,
Ра́дуйся, благодари́ти Бо́га их научи́вый.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 5
Буря грозная безбожия прииде на царство русское, в нейже подобаше тебе и роду твоему, якоже рече Спаситель, душу свою положити за други своя, темже за подвиг твой, и сынов твоих, ихже наставил еси в вере и верности, ныне воспеваем Бо́гу: Аллилуиа.
Икос 5
Наста́ вре́мя тру́дное, егда́ пала́ты царския во враче́бницы преврати́шася, а ца́рственныя осо́бы из кня́жеских в сестри́ческия оде́жды облачи́шася, ты же, святы́й Евге́ние, тве́рдою опо́рою и му́дрым сове́тником яви́лся еси́, во е́же в но́вом обстоя́нии герма́нской ра́неным помога́ти и во́ином на по́ли бра́ни окормля́ти; с ни́ми благода́рно зове́м ти:
Ра́дуйся, чад свои́х в ве́рности Бо́гу и Оте́честву воспита́вый,
Ра́дуйся, сы́на на по́ле бра́ни потеря́вый;
Ра́дуйся, в лече́бнице Цари́це помога́вый,
Ра́дуйся, царе́внам о́браз служе́ния бли́жним подава́вый;
Ра́дуйся, по се́лам ра́тным с Царе́м ходи́вый,
Ра́дуйся, с цесаре́вичем тя́готы похо́дныя дели́вый;
Ра́дуйся, за во́ины ду́шу положи́вый,
Ра́дуйся, кра́сная ми́ра сего́ ни во что́ вмени́вый;
Ра́дуйся, в простоте́ се́рдца пожи́вый,
Ра́дуйся, ду́шу свою́ слеза́ми убели́вый;
Ра́дуйся, милосе́рдием к Бо́гу прибли́зивыйся,
Ра́дуйся, к сыно́м Бо́жиим приобщи́выйся.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 6
Война́ и страда́ния си́лы наро́да ру́сскаго изнури́ша, богобо́рческия си́лы хра́брость, до́блесть и побе́ды во́инства росси́йскаго изврати́ша и умы́ во́инов пре́лестию диа́вольскою соблазни́ша, ты же, страстоте́рпче святы́й, Бо́гу, царю́ и отече́ству прися́зе, я́ко адама́нт, оста́лся ве́рен еси́; сего́ ра́ди воспева́ем Го́сподеви: Аллилу́иа.
Икос 6
Преда́тельство, молву и мяте́ж царь Никола́й претерпе́в, преще́ние братоуби́йства мятущихся людий русских прозре, от престо́ла ца́рскаго но по малоду́шию, а по щаде́нию, я́ко чадолюби́вый отец отъи́де, от престола отречеся, ты же, страстоте́рпче святы́й Евге́ние, в годи́ну лю́тую царя́ своего́ земна́го не оста́вил еси́; сего́ ра́ди пое́м ти:
Ра́дуйся, царя́ в душе́вных му́ках укрепля́вый,
Ра́дуйся, никогдаже его не преда́вый;
Ра́дуйся, служе́ние враче́бное безме́здно продолжа́вый,
Ра́дуйся, че́сть христианскую на блага земная не пременивый;
Ра́дуйся, в изгна́нии с царе́м доброво́льно пребыва́вый,
Ра́дуйся, цесаре́вича в неду́зе не оставля́вый;
Ра́дуйся, падение ца́рства Ру́сскаго со ско́рбию наблюда́вый,
Ра́дуйся, ве́ре Правосла́вной не измени́вый;
Ра́дуйся, непреста́нно Бо́гу моли́выйся,
Ра́дуйся, Та́инств Бо́жиих приобщи́выйся;
Ра́дуйся, к соверше́нству христиа́нскому стреми́выйся,
Ра́дуйся, покая́нии сердечнем от грех очи́стивыйся.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 7
Бо́га отве́ргнув и помаза́нника Его отри́нув, наро́д ру́сский кля́тву ро́ду Рома́новых преступи́, семе́йство ца́рское в заточе́ние осуди́, те́мже по ве́рности твое́й и до́лга ра́ди враче́бнаго с чето́ю венцено́сною в Тобо́льск спутеше́ствовал еси́, чад же твои́х во́ле Бо́жией вве́рил еси́, пра́ведный Евге́ние; сего́ ра́ди во умиле́нии серде́ц на́ших воспева́ем Бо́гу: Аллилу́иа.
Икос 7
В гра́де Тобо́льске врачбу ран и боле́зней жи́телей и стра́жей не оставля́л еси́, боля́щим и стра́ждущим многоразли́чными неду́ги безме́здно помогая́, любо́вь и почте́ние людий стяжа́л еси́, и семейство ца́рское от искуше́ний неприя́зненных всеобра́зно огражда́л еси́; тем же похва́льныя пе́сни от нас приими́ таковы́я:
Ра́дуйся, ча́д свои́х в ру́це Бо́жии преда́вый,
Ра́дуйся, про́мыслу Бо́жию во всем доверя́вый;
Ра́дуйся, в ми́ре зла и наси́лия с наде́ждою на Бо́га их отпуска́вый,
Ра́дуйся, любо́вию оте́ческою их покрыва́вый;
Ра́дуйся, а́ки ко́кош птенцы́ крила́ми их обыма́вый,
Ра́дуйся, к жи́зни без отца́ их наставля́вый;
Ра́дуйся, ко изгна́нию их предуготовля́вый,
Ра́дуйся, к судьбе́ тру́дней на стране́ чужде́й укрепля́вый;
Ра́дуйся, немощству́ющим лю́дем в ну́ждах помога́вый,
Ра́дуйся, ду́ши и сердца́ скорбя́щих тобольча́н увеселя́вый;
Ра́дуйся, стрегущым тя сострада́вый,
Ра́дуйся, врагом по́мощь ми́лостивно подава́вый.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 8
Вла́сти безбо́жныя боя́хуся заступления за семейство ца́рское и движе́ния «бе́лаго» проти́ву «диа́вола кра́снаго», посему сосла́ша тя, страстоте́рпче Евге́ние, доброво́льно крест свой на ра́мена взе́мшаго, в град Екатеринбу́рг с чето́ю ца́рскою, мы же тебе́, «су́дных врат черту́» невозвра́тно проше́дшему, во умиле́нии пое́м Святе́й Тро́ице: Аллилу́иа.
Икос 8
В дому Ипа́тьева, я́ко узник, ско́рбем ца́рственных страстоте́рпец сострада́я, жизнь и здра́вие их, я́ко врачь со тща́нием оберега́л еси́, «лебеди́ную пе́снь» слага́я и ча́яньми преле́стными себе́ не утеша́я, в животе погребе́нным себе́ непщевал еси́, живо́т свой в ру́це Бо́жии, а́ки и́стинный христиани́н предава́я, победи́телем сме́рти яви́лся еси́, тебе́, пра́веднику Христо́ву, вопие́м:
Ра́дуйся, ча́яньем преле́стным себе́ не пре́давый,
Ра́дуйся, мечта́ния диа́вольская попра́вый;
Ра́дуйся, правду выну в жизни смотре́вый,
Ра́дуйся, в ней кончи́ну живота́ свою́ я́ве узре́вый;
Ра́дуйся, ве́ру без дел ме́ртвой счита́вый,
Ра́дуйся, доброде́яние Христа́ ра́ди к вере прилага́вый;
Ра́дуйся, перве́йшее де́ло жи́зни свое́й соверши́вый,
Ра́дуйся, живо́т свой за бли́жних положи́вый;
Ра́дуйся, а́ки а́нгел к Небеса́м воспари́вый,
Ра́дуйся, песнь после́днюю к земле́ воструби́вый;
Ра́дуйся, все упова́ние свое́ на Бо́га возложи́вый,
Ра́дуйся, со́весть сынов русских гла́сом свои́м пробуди́вый.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 9
Наста́ вре́мя преселе́ния твоего́ от земли́ на Не́бо, си́лу ду́ха в час после́дний показа́л еси́, святы́й Евге́ние, егда́ с ца́рственными страстоте́рпцы на закла́ние, я́ко а́гнец смире́нно шел еси́, царя́ собо́ю загради́л еси́, в се́рдце от убийц беспоща́дных уязвлен был еси́, мы же со ско́рбию вопие́м Спаси́телю на́шему: Аллилу́иа.
Икос 9
Вети́я многовеща́нныя не возмо́гут по достоя́нию воспе́ти страда́ния твоя́ за Христа́, страстоте́рпче Евге́ние, убив плоть твою, ду́шу убить не возмого́ша сопоста́ты безбо́жнии, ты бо вся претерпе́л еси́, су́ть и́мени своего́ «жи́знь» оправда́л еси́, я́ко и́стинный хлеб Христу́ испече́ся и плод сла́дкий дре́ву ра́йскому приви́ся; сего́ ради в стра́се Бо́жием вопие́м ти:
Ра́дуйся, собо́ю святаго царя́ загради́вый,
Ра́дуйся, жре́бий страстоте́рпец ца́рственных раздели́вый;
Ра́дуйся, не́мощи и боле́зни людски́я милосе́рдно врачева́вый,
Ра́дуйся, за благая рану в се́рдце получи́вый;
Ра́дуйся, множество люде́й от сме́рти цели́вый,
Ра́дуйся, за благая ча́шу зло́бы челове́ческия испи́вый;
Ра́дуйся, сна́добьи целе́бными страда́льцем раны умаща́вый,
Ра́дуйся, за благая ра́ны сме́ртныя на себе́ прия́вый;
Ра́дуйся, ни́щих с одра́ сме́рти из узилищ поднима́вый,
Ра́дуйся, за благая во узах сме́рть прия́вый;
Ра́дуйся, убо́гим приста́нище, пи́щу и оде́жду дава́вый,
Ра́дуйся, за благая ри́зы сме́ртныя оде́явый.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 10
Последи́ безбо́жных гоне́ний и па́губы Це́рковь Ру́сская Правосла́вная по сло́ву проро́ческому и во́ле Бо́жией возроди́ся, муче́ния и убие́ния за ве́ру христиа́нскую прекрати́шася и народ российский к покая́нию и па́мяти о злодея́ниих, соверше́нных на земли́ Ру́сской обрати́шася, темже имя твое́, страстоте́рпче Евге́ние, из забве́ния возврати́ся; сего́ ра́ди с ра́достию серде́ц и весе́лием душ на́ших вопие́м Созда́телю на́шему: Аллилу́иа.
Икос 10
Пою́ще по́двиг твой о Христе́, пра́ведный страстоте́рпче, хва́лим долготерпе́ние твое́, ублажа́ем му́ченическую кончи́ну, почита́ем и свяще́нную па́мять твою́, засту́пниче наш и святы́й врачу́, и в похвалу́ тебе́ зове́м сицева́я:
Ра́дуйся, кри́не ра́йского прозябе́ния,
Ра́дуйся, душ на́ших увеселе́ние;
Ра́дуйся, кро́вию пра́ведною обагре́нный,
Ра́дуйся, к ли́ку ру́сских святы́х сопричте́нный;
Ра́дуйся, честно́е Христо́во избра́ние,
Ра́дуйся, непоро́чное Бо́жие благоуха́ние;
Ра́дуйся, ра́достное зре́лище а́нгелов,
Ра́дуйся, тре́петное удивле́ние челове́ков;
Ра́дуйся, черто́гов Небе́сных обита́телю,
Ра́дуйся, в моли́твах Бо́гу о нас те́плый предста́телю;
Ра́дуйся, собла́зны миродержца победи́вый,
Ра́дуйся, побе́дою твое́ю небе́сных и земны́х увесели́вый.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 11
Лику́ет град свята́го Петра́, я́ко собо́р врачей правосла́вных российских, егда́ собра́шася под апо́стольским кро́вом сего́, возвели́чил свято́е имя твое́, страстоте́рпче Евге́ние, правосла́вным и вое́нным враче́м в назида́ние предлага́я по́двиг тво́й, ты же с крото́стию в поруга́нии и забве́нии пребыва́вый, в дни сии возвели́чился еси в досто́инстве земне́м и небесне́м, темже в покая́нии пое́м Вседержи́телю: Аллилу́иа.
Икос 11
Пе́ние похва́льное прино́сим ти, сла́вный страстоте́рпче Евге́ние, ублажа́юще вся боре́ния твоя́, како непобеди́мою си́лою Христо́вою победи́ дре́вняго врага́ ро́да челове́ческаго и посрами́ безбо́жную е́ресь большеви́стскую, мы же удивле́ния испо́лненнии, зове́м ти:
Ра́дуйся, ми́ром благода́ти пома́занный,
Ра́дуйся, с земны́м ми́ром страстьми́ несвя́занный;
Ра́дуйся, сто́лпе досяза́яй до Небеси́,
Ра́дуйся, земны́я плотски́я отверга́яй сове́ты;
Ра́дуйся, я́ко оре́л воспари́вший в го́рняя,
Ра́дуйся, не оста́вивший се́рдца до́льнему;
Ра́дуйся, све́та невече́рняго зри́телю,
Ра́дуйся, за земны́я оби́ды неотмсти́телю;
Ра́дуйся, поко́ем ра́йскими причастивыйся,
Ра́дуйся, черто́ги земными не соблазнивыйся;
Ра́дуйся, дерзнове́нием к Бо́гу распаленный,
Ра́дуйся, земны́ми блага́ми не уязвленный.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 12
Вся́кое естество́ удиви́ся, сиянию в тебе́ благодати и богатству доброде́телей, ангелоподо́бней чистоте́ твое́й, ве́лией до́блести в гоне́ниях лю́тых, кре́пкой любви́ ко Христу́ и мно́гому сострада́нию лю́дем, в них же твори́ши пресла́вная, во е́же пе́ти Ему́: Аллилу́иа.
Икос 12
Це́рковь Ру́сская тя просла́ви, я́ко пра́ведника, стратоте́рпца, врача́ благода́тнаго, охладе́ бо сердца́ челове́ческая к сострада́нию и милосе́рдию, тя врача́ богому́драго показа́ сыно́м челове́ческим, с душе́ю окамене́нною, да воскре́снут, обратя́тся с путе́й поги́бельных и к исто́ком отце́в свои́х возвратя́тся, воспева́я ти такова́я:
Ра́дуйся, го́рдость сынов ве́ка сего́ посрами́вый,
Ра́дуйся, смире́ние до сме́рти нам яви́вый;
Ра́дуйся, тщесла́вие уче́ных уничижи́вый,
Ра́дуйся, кро́тость и скро́мность возвы́сивый;
Ра́дуйся, за́висть и лесть соработник попра́вый,
Ра́дуйся, в служе́нии враче́бнем всем помога́вый;
Ра́дуйся, в желаниих земных себе смирявый,
Ра́дуйся, терпе́ние христиа́нское во всем явля́вый;
Ра́дуйся, стремлением греховным себе не предавый,
Ра́дуйся, целому́дрием и воздержа́нием себе́ украша́вый;
Ра́дуйся, в тру́дных обстоя́ниих не уныва́вый,
Ра́дуйся, в благодаре́нии Бо́гу за вся пребыва́вый.
Ра́дуйся, страстоте́рпче пра́ведный Евге́ние, врачу́ благода́тный и ми́лостивый.
Кондак 13
О преди́вный страстоте́рпче Христо́в и пра́ведный врачу́ Евге́ние! Ми́лостиво приими́ сие́ ма́лое наше приноше́ние, от многообра́зных недуг душе́вных же и теле́сных исцели́ ны, и предстательством твои́м от враг ви́димых и неви́димых сохрани́, в час по́двига за ве́ру Христо́ву укрепи́ и ве́чнаго муче́ния изба́витися нам Го́спода умоли́, да во Ца́рствии Его́ вы́ну воспева́ем: Аллилу́иа (трижды).
Сей кондак читается трижды. Затем повторяем 1-й икос и 1-й кондак.
Молитва
О, вели́кий уго́дниче Христо́в, страстоте́рпче свя́тый и пра́ведный врачу́ Евге́ние! Престо́лу Бо́жию со ца́рственными страстоте́рпцы предстои́ши и триипоста́сныя Его сла́вы наслажда́ешися. Умилосе́рдися над на́ми гре́шными, услы́ши стена́ние и вопль наш. Тебе́ убо про́сим: не пре́зри нас, недосто́йных, моля́щихся тебе́ и твое́й по́мощи тре́бующих. Бу́ди нам в неду́зех лю́тых стра́ждующим цели́тель, в печа́лех, преда́тельствах и гоне́ниях уте́шитель, напа́ствуемым покрови́тель, уязвле́нным исцеле́ния пода́тель, в ско́рбех о ча́дех гото́вейший предста́тель, враче́м и се́страм милосе́рдия благочести́вым и правове́рным в по́двизе милосе́рднаго служе́ния боля́щим укрепи́тель. Исхода́тайствуй всем нам вся я́же ко спасе́нию поле́зная, я́ко да твои́ми ко Го́споду Бо́гу моли́твами получи́вши благода́ть и ми́лость, просла́вим всех благи́х исто́чника и даропода́теля Бо́га, еди́наго в Тро́ице Святе́й сла́вимаго Отца́ и Сы́на и Свята́го Ду́ха ны́не и при́сно и во ве́ки веко́в. Ами́нь.
Одобрен правлением Общества православных врачей Санкт-Петербурга им. свт. Луки (Войно-Ясенецкого)
для келейного чтения.
